Op Platt: Kremschnitt

Titel und Untertitel

Kremschnitt

Mein Beitrag
Ersteller und Datum

Erstellt von Sabrina Böhmer am 17.05.2015
Zuletzt bearbeitet am 18.05.2015

Autor dieses Beitrags

Karl H. Petersen

Haupttext

Du kennst düsse leckere Koken mit de söte Glasur boben op. Jümmer, wenn du dorvon en Stück avsteken willst, brickt de Kram tosomen wie dat Is op en Diek, dat noch to dünn to Striedschohlopen is. Du hest luuder Blätterdeekstücken un geele Kram. Aver freu di: Du kümmst nu an de geele Puddingschicht. Lecker, kann ik di nur seggn, so richtig wat för söte Deerns un Jungs, aver ok för Omas un Opas. As ik lütt weer, güng mien Moder in Steenfeld av un to över sun smalen Footstieg to Bäcker Haß. Se wull för de Sünndagskaffee en poor Viefpenningsstüke halen. Du hest richtig hört: Sun Kremschnitt för fief Penn! Ganz stimme dat aver nich, denn de Beteknung Fiefpenningsstück weer schon en poor Johr old, un jetzt kossen düsse lütten Koken schon acht Penn. Överlegg mal, wie veel sun Kremschnitt hüt kost un rekne dat mal in Penns üm! Ik kann di nur raden: Fall dorbi nich op den Rüch! In de Bäckerladen stünn Tante Dodde. Se harr en düsterblaue Kittelschört an un weer de oole Bäckerfru. Se bedeene meistens de Kundschap. Mien Moder sprok se nich mit Tante Dodde an, se sä Fru Haß. Tante Dodde sän wi Kinner, ok, wenn se nich uns Tante weer. Se aver freue sik, wenn wi se so ansproken. Moder wiese op dat groote swatte Blick, dat op de Thek mit de veelen Fiefpenningstücken stünn. Dree Kremschnitten bruke se för uns lütt Familie. Se köffe aver ok noch en Swattbrot. Dat Swatte koste 45 Penn un hüterdags? Du warst villicht seggn: „Dat weern noch Tieden!“. Aver so rosig weern se nich. Ok domals geev dat en Barg arme Lüüd, un wi harrn de slimme Nazitied. Aver dat Sünnerbare weer, dat dat veele gor nich markt hem. Ik ok nich. Denn ik weer Pimpf. En Deel kreeg Moder op den Rüchweg mit. Op de Schoolplatz öve des SA, un de Föhrer bölke ganz luut sien Kommandos: „Links schwenkt, marsch, rechts schwenkt, marsch! Laufschritt, marsch, marsch!“ Se övten schon för den Krieg. Aver dat wüssten se domols nich. Dat wüsse nur uns Verföhrer un sien Komplizen, düsse Aastüch. Eenmal in de Week brukten wi gornich tom Bäcker to lopen. Dor keem Herr Marxen mit Perd un Wag. In uns Dörp heete he nur „ Kremschnitt“, wiel dat he ok düssen Koken verköffe. Dorto make he de Luk vun sien lütte Verkopswagn open, un de Kunnen keeken op Brote, Brötchen un Koken un söchten ut, wat se anlache. Av un to keem ok de Brebler Bäcker Jürgensen. Mien Moder leep dann dörch uns Gorn an de Straat, köffe Swattbrot un för mi en Hefesneck, de vun de Zuckerglasur so schön söt weer. Wenn ik de in de Hand harr, fung ik an to puulen. Se weer ja en Sneck un leet sik Stück för Stück avrolln. Wenn ik doran denk, löppt mi noch dat Water in de Mund tosamen. Veel hett sik in de Twischentied ännert. Uns Bäcker hem dat mit ehren Nawass suurer, sünnerlich mit de Lehrlinge. Wer vun de jungen Lüüd hett Lust, nachts um Klock dree optostahn? Un dat nich eenmal in de Week, nee jeden Dag! In de Backstuv warrn nich dree Sorten Brötchen wie to Omas Tieden backt. Dormit is de Kundschap nich tofreeden. Nee, dat gifft wiet över tein Sorten. Un de hebbt tom Deel schöne Namen wie Weltmeister, Fiefkornbrötchen, Kieler, un in Segebarg gifft dat sogor Höhlenknacker.

De eene Köper will Körnerbrötchen, de anner mag keen Körner, he will helle Semmeln. Wat en annere gor nich verstahn kann. He will düsterbruune. Un de Bäcker mutt för se all backen.

Ik denk veele Johrn trüch, dor güng ik morgens gern to Martha un hale Mohnbrötchen. De weern so schön week un harrn boomop meist sun Muster wie en Schruuv vun en Schipp. Dorop weern veele Mohnkorns verstreut. Sun feines Brötchen gifft dat leider nich mehr, denn Martha is schon lang in Rente, un man mutt op ehr jümmer fründliches Gesicht verzichten. De Kremschnitten sünd aver jümmer noch dor, un se hebbt sik beet op den Pries kuum verännert. Stickst du mit den Löpel to, brickt dat Kunstwark tosamen, un de Pudding quillt na buten. Fohr mal mit dien Finger dran vörbi un denn dörch dien Snut. Ik kann di seggn: „Lecker!“

Bilder
Bewertungen
Wie anschaulich finden Sie diesen Beitrag?
1 2 3 4 5 Bewertungen: 0Jetzt bewerten
Wie informativ finden Sie diesen Beitrag?
1 2 3 4 5 Bewertungen: 0Jetzt bewerten
Weitere Informationen
Jahr

2015

Pinnwand

  • Auf dieser Pinnwand wurden noch keine Einträge hinterlassen.

Hier anmelden

Sie sind noch kein Mitglied der Community?

Jetzt beteiligen

Jetzt einen Beitrag verfassen