Op Platt: De erste Schooldag

Titel und Untertitel

De erste Schooldag Einschulung 1939

Mein Beitrag
Ersteller und Datum

Erstellt von Peter Burgdorff am 06.03.2014

Autor dieses Beitrags

Peter Burgdorff

Haupttext

De erste Schooldag

Ganz genau weet ik dat nich mehr: weer ik eegentlich opgeregt? Ik gläuw nich! Man mi is noch hüüt in mien Kopp, wat ik an düssen eersten Schooldag an Ostern 1939 beleevt heff:

De Rekter, een grooten staatschen Kierl mit'n opfulligen langen Hals un son gräsig knarrige Stimm, hett son lütten Snack mookt, wonem wi Kinner nix vun mitkreegen. D? t weer woll meist wat för die Öllern. He harr uns een Frollein äs Lehrerin towiest. Jedeen kenn ehr: Lotte Nordmann. Frollein Nordmann, se leeg Wert op dat „Frollein", harr woll de ersten fofftig Joahrn achter sik un harr woll vun Rheuma verkrüppelte Harm un Fööt. Achter in Nacken harr se son luerlütten Hoardutt. Boss harr se ok nich; derwiel se woll Lehrerin worrn weer.

Wi seeten mit neegenundortig Kinner, Jungs un Deerns, op uns Platz in de Klass. De Modders un Vadders harrn sik son beetn op de Dischkanten sett. Vor mi seet en Vadder in Uniform. As he sin Mutz affnähm, keek ik op son groot Buul in sin Dööz. Düsse Buul harr mi dat andoon. Se weer meist tein Zentimeter groot un gung op un dool, äs wenn se pumpt. Mol weer se 'n Lock un mol weer se 'n Buul.

Sowat harr mien Oog jümmers noch nich sehn: 'ne Buul in Kopp, de op un doolgüng? Wat much doar bloots in Kopp weesen, dat dat jümmers op un dool geiht? Ik weer rein faszineert un hör goarnich, wat Frollein Nordmann doar vorn all de Regularien to vertelln harr.

Denn müssen de Öllern rut ut de Klass un wi weern mit Frollein Nordmann alleen. Nu kunn ik erstmol sehn, wo wi weern: in en Klassenruum. Dree Reegen Doppelbänke: boben de Schrievplatt, in de Mitt doarvun weer en lütt Klappschapp, dat mi neeschierig mook. As ik de Klapp opmook, keen doar son lütten Buddel to 'n Vörschien, de so utsäh, äs Opa sin Pinkelflasch to Huus; he nömt

hr „de Eunt", blots 'n beeten wat lütter. Doar weer Tinte bin'n ton Schrieven mit'n Fedderholder, wenn wi dat man erst kunn'.

Uwe seet blangen mi. He wull dat genau weeten. He fummel dat krumme Ding ut sin Schapp, ganz fix holl de lütt Buddl an Mund un nahm 'n kräftigen Sluck.

Frollein Nordmann harr dat nich so gau mitkreegen. Man wi Kinner wulln uns kaputtlachen. Uwe harr doch nu en ganz blauet Snutenwark un sah bannig sünnerlich ut. Dat weer denn ok dat letzte Belevnis mit Uwe. He weer woll doch noch nich schollriep un dröff noch en Joahr Enger speeln.

För all uns anner Kinner keem nu obers de „Ernst des Lebens" richtig in Foahrt.

Bilder
Bewertungen
Wie anschaulich finden Sie diesen Beitrag?
1 2 3 4 5 Bewertungen: 0Jetzt bewerten
Wie informativ finden Sie diesen Beitrag?
1 2 3 4 5 Bewertungen: 0Jetzt bewerten
Weitere Informationen
Jahr

1939

Ort

Pinneberg

Pinnwand

  • Auf dieser Pinnwand wurden noch keine Einträge hinterlassen.

Hier anmelden

Sie sind noch kein Mitglied der Community?

Jetzt beteiligen

Jetzt einen Beitrag verfassen